गावातील श्री जोतिर्लिंग मंदिर विकास समितीच्या माध्यमातून २००० सालापासून मंदिरामध्ये नवरात्र उत्सव मोठ्या प्रमाणात साजरा केला जाऊ लागला. दसऱ्याला सोने लुटण्याची पुर्वीची बंद पडलेली पद्धत, गावचा उरुस सुरू करण्याचे पूर्ण श्रेय या समितीला आहे. हे वास्तव म्हणजे सत्य नाकारता येत नाही.

वेगवेगळ्या खेड्यांना-शहरांना ओळख मिळते ती त्या ठिकाणी होऊन गेलेल्या थोरा-मोठ्यांमुळे नावलौकिक मिळविलेल्या माणसांमुळे. कधी कधी याच्या उलटही घडतांना दिसते. मात्र अशीही काही गावं असतात, ज्यांची ओळख त्या ठिकाणच्या माणसांमुळे तर असतेच, पण तेथील वृक्ष प्राणी पक्षांमुळेही असते. या गावांत पहिल्यांदाच जाणाऱ्यांच ते आकर्षण बनतात. कोल्हापूर जिल्ह्यातील करवीर तालुक्यातील ‘दोनवडे’ हे गाव. पुरातन काळापासून ग्रामीण संस्कृती जपलेले गांव आहे. कोल्हापुर शहरापासून अगदी जवळ असूनसुद्धा एकोप्याने राहणारे, राजकीय, सहकार तसेच क्रिडाक्षेत्रात आपले नाव सतत उल्लेखनीय कामगिरीमुळे जिल्ह्यामध्ये महाराष्ट्र राज्यात देखील नावाजले जाते. आता या गावाला ‘दोनवडे’ नाव का पडले? असा प्रश्न उभा राहतो आणि सुरवातीस म्हटल्याप्रमाणे गावाचे नांव कसे पडते याचा उहापोह झाला आहेच तर दोनवडे हे नांव ‘दोन वडाच्या म्हणजे गावात असणाऱ्या प्राचीन वट वृक्षावरून म्हणजे वडाच्या झाडावरून पडले आहे असे गावातील वृद्ध मंडळी सांगतात.