कोल्हापूर शहरापासून अवघ्या सात किलोमीटर अंतरावर असलेले दोनवडे गाव क्रीडा व सहकार क्षेत्रात नावाजलेले आहे. ग्रामदैवत श्री.केदारलिंगसह श्री.नरहरी, श्री.भावेश्वरी, श्री.महादेव, श्री.एकविरा, श्री.ब्रम्हदेव ब्रम्हनाथ, श्री.म्हसोबा, श्री.काशीदेव, श्री.भैरव अशी मंदिरे गावात आहेत. गावातील नवरात्र उत्सव परंपरा मोठी आहे. नवरात्र काळात येथील पाटील, कदम, पोवाळकर अशा मानाच्या सासनकाठ्या उत्सवात सहभागी असतात. दोनवडे गावाचे नाव दोन वडाच्या झाडांवरून पडले आहे. दोनवडे गावाच्या मंदिराचे बांधकाम पांडवकालीन शैली असलेले होते. दोन्ही बाजूंना आसनव्यवस्था होती. नंतर वर चढून गेल्यावर हॉल होता. लाकडी खांबावर भार पेललेले मंदिर होते. मुख्य मंदिराच्या मागे चिंचेचे मोठे झाड होते. मंदिराच्या बाजूला गणपती व हनुमान यांची छोटी मंदिरे आहेत.